’n Waardevolle les vir kinders (en hulle ouers)

Feathers in the wind

Van skinder en stories aandra, kon niemand vir Henko Hendriks iets leer nie. Hy was die beste.  Dít was totdat ds. Cuyper gekom het…

Sommer die tweede preek van ons nuwe dominee het Henko se gewete aangekla.  Ek onthou nog sy teks soos gister: “So is die tong ook maar ‘n klein liggaamsdeeltjie, en tog het dit groot mag. ‘n Klein vuurtjie kan ‘n groot bos aan die brand steek.”  Dominee het uit Jakobus 3 gepreek en vers 5 was sy fokus.

Henko Hendriks was Maandagoggend al saam met die hoenders op.  Toe die horlosie agtuur slaan, is hy so vinnig soos die wind straat-af pastorie toe.

“Dominee,” het hy begin, “vandag moet jy my help!”

“Nou hoe so, Henko?” wou dominee weet.

“Dis my los tong, Dominee!  Wat kan ek doen om al die kwaad wat ek gesaai het, ongedaan te maak?”

Ds. Cuyper het sy ken gevryf en stadig begin praat: “Hier is ’n handvol gansdons.  Gaan vanoggend na die huis van elke persoon wat jy te na gekom het deur ’n skinderstorie.  Sit dan ’n veertjie op die drumpel van die voordeur neer, en gaan na die volgende huis – tot jy klaar is.”

Henko is haastig en baie dankbaar daar weg.  Hy het sy taak met ywer aangepak.

Dit was omtrent drie-uur die middag, toe is hy terug by Dominee.

“Ai, Dominee, baie dankie!  Ek het nie gedink dit sal só maklik wees nie.”

“Maar jou taak is nog nie klaar nie,” het Dominee gesê.

“Nie?” wou Henko verdwaas weet.  “Wat moet ek nóg doen?”

“Ek wil hê jy moet nou al met jou spoor langs teruggaan en al die veertjies weer gaan bymekaarmaak en vir my terugbring.”

Henko was verdwaas. “Maar dit is onmoontlik!  Die wind het teen hierdie tyd ál die vere weggewaai!”

“Net so onmoontlik is dit om die woorde wat ons gesê het, ongedaan te maak…  Ek wil vandag vir jou sê wat Jesus vir jou sou gesê het: Gaan heen en sondig nie meer nie!”

Henko het stil-stil omgedraai en huis toe gegaan.  So het hy sy les geleer.  Daar het nie weer ’n skewe woord oor ’n ander mens oor sy lippe gekom nie.

Anoniem

Advertisements

About baptistekerkkemptonpark

Commissionerstraat 85
This entry was posted in Christelike lewe, Kinders. Bookmark the permalink.